नेरुळ भागात राहणाऱ्या अमोल जाधव (२५) या तरुणाने किरकोळ कारणावरून आपला मित्र दीपक इंगुळगे (२८) याच्या गळ्यावर चाकूने वार करून त्याची हत्या करण्याचा प्रयत्न केल्याची घटना गुरुवारी रात्री नेरुळमध्ये घडली. या हल्ल्यात दीपक गंभीर जखमी झाला असून त्याला नेरुळमधील तेरणा रुग्णालयात दाखल करण्यात आले. नेरुळ पोलिसांनी या प्रकरणातील आरोपी अमोल जाधव याला अटक केली.

या घटनेतील जखमी दीपक इंगुळगे व त्याच्यावर प्राणघातक हल्ला करणारा त्याचा मित्र अमोल जाधव हे दोघेही नेरुळ भागात राहण्यास आहेत. काही महिन्यांपूर्वी या दोघांमध्ये किरकोळ कारणावरून वाद होऊन भांडण झाले होते. तेव्हापासून हे दोघे एकमेकांशी फटकून वागत होते. दरम्यान, अमोल जाधव याला हॉटेल व्यावसायिक असलेल्या दीपकच्या मित्राचा मोबाइल नंबर हवा होता. मात्र दीपकने त्याला दिला नाही. त्यामुळे अमोलला त्याचा राग आला. त्याने गुरुवारी रात्री ११ वाजण्याच्या सुमारास दीपकला त्याचा दुसरा मित्र गणेश भोसले याच्या माध्यमातून नेरुळ सेक्टर-१४मध्ये बोलावून घेतले. त्यानुसार रात्री पावणेबारा वाजण्याच्या सुमारास दीपक आपल्या कारने सेक्टर-१४ भागात आला. त्याठिकाणी अमोल, गणेश व इतर दोघे मित्र दीपकची वाट पाहत उभे होते. दीपक आल्यानंतर अमोलने त्याला बाजूला नेले. त्यानंतर त्याने संधी साधून आपल्याजळच्या चाकूने त्याच्या गळ्यावर वार केले. यावेळी रक्तबंबाळ झालेल्या दीपकने आरडाओरड केल्यानंतर अमोल मोटारसायकलवरून पसार झाला. इतर मित्रांनी दीपकला नेरुळमधील तेरणा रुग्णालयात दाखल केले. या घटनेची माहिती मिळताच नेरुळ पोलिसांनी घटनास्थळी धाव घेऊन आरोपी अमोल जाधव याला ताब्यात घेऊन त्याला अटक केली.